യുകെ യൂണിവേഴ്സിറ്റികളിൽ നഴ്സിംഗ് കോഴ്സുകൾക്ക് പ്രവേശനം നേടിയ സ്റ്റുഡൻറുകളുടെ എണ്ണത്തിൽ റെക്കോർഡ് വർദ്ധനവ് ഉണ്ടായി. അപേക്ഷകളുടെ എണ്ണത്തിൽ 6.7 ശതമാനം വർദ്ധനവാണ് UCAS രേഖപ്പെടുത്തിയത്. 2017ൽ ഗവൺമെൻറ് നഴ്സിംഗ് സ്റ്റുഡന്റ് സിനുള്ള ബർസറി നിർത്തലാക്കിയതിനുശേഷം ആദ്യമായാണ് കൂടുതൽ പേർ ഈ രംഗത്തേയ്ക്ക് കടന്നു വരുന്നത്. 2019 ൽ 54,225 പേർ നഴ്സിംഗ് കോഴ്സുകൾക്ക് അപേക്ഷിച്ചിരുന്നു. 2018 ൽ 50,805 പേർ ഉണ്ടായിരുന്നപ്പോൾ, 66,370 പേർ 2016 ൽ അപേക്ഷിച്ചിരുന്നു.

നിലവിൽ 44,000 നഴ്സിംഗ് വേക്കൻസികൾ യുകെയിൽ ഉണ്ട്. ആവശ്യമുള്ള നഴ്സുമാരുടെ എണ്ണത്തിന്റെ 12 ശതമാനം വരുമിത്. അടുത്ത പത്തു വർഷത്തിൽ ഒഴിവുകളുടെ എണ്ണം 100,000 ആയി ഉയരും. നിരവധി നഴ്സുമാർ റിട്ടയർ ചെയ്യുന്നതും പ്രഫഷൻ വിട്ടു പോകുന്നതു മൂലമോ ആണിത്. 2017 ൽ ബർസറി നിർത്തലാക്കിയതുമൂലം നഴ്സിംഗ്, മിഡ് വൈഫറി സ്റ്റുഡന്റുകൾ ഓരോ വർഷവും 9,000 പൗണ്ട് ഫീസ്, മറ്റു സൗകര്യങ്ങൾ എന്നിവയ്ക്കായി നല്കണം.

ഈ വർഷത്തെ അപേക്ഷകരിൽ 30,390 പേരെ യൂണിവേഴ്സിറ്റികൾ നഴ്സിംഗ് ഡിഗ്രി കോഴ്സിനായി അഡ്മിഷൻ നല്കി. കഴിഞ്ഞ വർഷം 28,540 പേർ അഡ്മിഷൻ നേടിയിരുന്നു.