ലീഡ്സിൽ ക്ലാസ് എ ഡ്രഗിൻ്റെ ലഭ്യത സാധാരണമാകുന്നു. കസ്റ്റമർക്ക് കൊക്കെയിൻ എത്തിക്കുന്നത് ടേക്ക് എവേ ഡെലിവറിയേക്കാളും വേഗതയിലാണ്. കൊക്കെയിനും എക്സ്റ്റസിയും സർവ്വസാധാരണമായി വിദ്യാർത്ഥികൾക്ക് സപ്ളൈ ചെയ്യപ്പെടുന്നുണ്ട്. ബിസിനസ് കാർഡുള്ള ഡീലർമാരിൽ നിന്നാണ് ഉടൻ ഡ്രഗ് എത്തുന്നത്. ഡീലറിന് ഒരു ടെക്സ്റ്റ് മെസേജ് അയച്ചു കഴിഞ്ഞാൽ 20 മിനിട്ടിനുള്ളിൽ മറുപടി ലഭിക്കും. അതിനു ശേഷം 5-10 മിനിട്ടിൽ ഡ്രഗ് കസ്റ്റമറുടെ പക്കലെത്തും.

ലീഡ്സിലെ ഹൈഡ് പാർക്ക് ഭാഗത്ത് എത്തുന്നവരെ ഡ്രഗ് ഡീലർമാർ ഇടപാടിനായി ക്ഷണിക്കുക പതിവാണ്. മുന്തിയ കാറുകളിലാണ് ഇവരുടെ സഞ്ചാരം. സെക്കൻ്റുകൾക്കുള്ളിൽ ബിസിനസ് കാർഡ് കൈമാറി ഡീലർമാർ മറയും. കാർഡിൽ ഒരു പേരും ഫോൺ നമ്പരും ഉണ്ടാവും. യുണിവേഴ്സിറ്റി സ്റ്റുഡൻ്റുകളെയാണ് പ്രധാനമായും ഡ്രഗ് മാഫിയ നോട്ടമിടുന്നത്. ഏകദേശം 65,000 സ്റ്റുഡൻറുകൾ ലീഡ്സിൽ ഉണ്ട്. ഒരു ഗ്രാമിന് 15 - 20 പൗണ്ടിനാണ് വില്പന തുടങ്ങുന്നത്. ഇതിന് അടിമകളായിക്കഴിഞ്ഞാൽ കൈയിലുള്ളതെല്ലാം പിന്നീട് മാഫിയ സ്വന്തമാക്കുന്ന സ്ഥിതി വരും. 16 നും 24നും ഇടയിൽ പ്രായമുള്ളവരിൽ ക്ലാസ് എ ഡ്രഗ് എടുക്കുന്നവരുടെ എണ്ണത്തിൽ 2003 ന് ശേഷമുള്ള ഏറ്റവും കൂടിയ നിരക്കാണ് ഇപ്പോഴെന്ന് ഹോം ഓഫീസ് പറയുന്നു.