കൊറോണ വൈറസിൻ്റെ പശ്ചാത്തലത്തിൽ ഇന്ത്യയിലേയ്ക്കുള്ള യാത്രകൾക്ക് കൂടുതൽ നിയന്ത്രണം പ്രഖ്യാപിച്ചു. ഇതനുസരിച്ച് യുകെയിൽ നിന്നുള്ളവർക്ക് ഇന്ത്യയിലേയ്ക്ക് മാർച്ച് 18 മുതൽ യാത്ര ചെയ്യാനാവില്ല. മാർച്ച് 31 വരെയാണ് ഈ താത്കാലിക നിയന്ത്രണം ഏർപ്പെടുത്തിയിരിക്കുന്നത്. യൂറോപ്യൻ യൂണിയൻ രാജ്യങ്ങൾ, യൂറോപ്യൻ ഫ്രീ ട്രേഡ് അസോസിയേഷൻ, ടർക്കി എന്നിവിടങ്ങളിൽ നിന്നുള്ളവർക്കും നിരോധനം ബാധകമാണ്. ഈ രാജ്യങ്ങളിൽ നിന്നുള്ളവരെ ഇന്ത്യയിലേയ്ക്കായി ഫ്ളൈറ്റുകളിൽ ബോർഡ് ചെയ്യരുതെന്ന് എയർ ലൈനുകൾക്ക് ഇന്ത്യൻ സിവിൽ ഏവിയേഷനിലെ ഡെപ്യൂട്ടി ഡയറക്ടർ ജനറൽ നിർദ്ദേശം നല്കിയിട്ടുണ്ട്.

യുഎഇ, ഖത്തർ, ഒമാൻ, കുവൈറ്റ് എന്നീ രാജ്യങ്ങളിൽ നിന്നോ, ഈ രാജ്യങ്ങളിലൂടെ ട്രാൻസിറ്റ് വഴിയോ ഇന്ത്യയിലെത്തുന്നവർക്കുള്ള നിർബന്ധിത ക്വരൻറിൻ 14 ദിവസമാക്കിയിട്ടുണ്ട്. ഈ നിയന്ത്രണവും മാർച്ച് 18 മുതൽ നിലവിൽ വരും.